Mehr ertrincken im weinglaß / dann im Meer. Fraß bringt mehr vmb / dann das schwerd.

Daß Gott ein wacker nüchtern leben begert / thůt er vnserthalb / er kauffet jhm nichts drumb / so bleibt er gleichwol Gott / wann wir vns all zu tod fressen. Nüchtern aber ist mann am leib gesundt vnd wacker /[381] an der seel munter vnnd speculierend. Voll seind die gedancken doll / daß der mensch voll seines fleysches nit mehr kan gewaltig sein / vnnd leicht wider ehr thůt. In diser vollen weise vnd überfluß geht das gůt auch ann galgen dahin. Also daß vns füllerei vmb vnsern gsunden leib (den doch die welt für das haupt gůt helt) seel / ehr / vnd gůt bringt. Item vmb allen verstand vnd weißheyt / Osee iiij. Dann wo mann voll ist / da ist mann auch doll / vnkundig / thorecht /kranck / hat trieffend augen / zitterende händ / podagram / stinckenden athem / allen lastern ein offne thür / vnnd das hertzleyd gar etc.