[189] Der flaschen auff den riemen tretten.
Ex amphiteto uel cottabo bibisti.

Einn Wilkomm inn bůsen stossen. Bist am end gesessen / es ist offt an dich kommen.

Mann můß mancherlei anfahen / biß mann den wein in die leut bringt / Yetz hat mann vn den würffel in dem glaß vermacht / was einer schüttelt / so vil můß er trincken / Yetz hat man einn Wilkomm /damit mann die leut empfahen / vnnd den lieben gast (dem mann kein ander ehr kan anthůn / mann mache jn dann / als ein saw die ander / voll) wil frölich machen / den kan keiner von sich setzen / er sauffe jhn dann auß. O das ist dann ein grosse ehr / wer ehe feirabent macht / vnnd den wůst herauß thůt / der ist sammer bocks marter ein gůt gesell / ein weltmensch /seins leibs ein held / er darff doch inn stich sitzen /vnd einem gůten gesellen eines gewarten / biß jn der Bacchus (so noch stärcker ist dann er / vnd nicht gern mit jhm zu grob schertzen laßt) vnder die banck wirfft / daß er anfahet die truncken Metten mit den langen noten zusingen / daß all hund vnd sew zůlauffen / vnd sich des gsangs vnd der Metten frewen.