Ju schreien / eh man übern graben kompt.
Encomia canere ante uictoriam.

Das Kitzlin essen eh es die Geyß gebirt.

Die zech vor der ürten machen / oder on den Wirt rechnen. Das korn essen / das noch nit gesähwet ist. Vnderm schnee schneiden. Summa / sich etwas rhümen / das man noch nit hat / vnd noch ferr dahin ist /Darauß eben so bald nicht wirt als etwas. Als jhene magd / so eyer ghen marckt trůge / vnd groß anschläg hette / wie sie das gelt wolt anlegen / in dem übern zaun fiele / vnd die eyer alle zerbrach.

Item etlich / eh sie weiber nemen / schlagen sie an /was sie auß jm sönen vnd töchtern machen / Da spricht man: Die kůh hat noch nit kalbet / vnd ladest gäst zum kalbskopff. Also theylen vil das erb vor dem erbfall vnd todt / vnnd werden geerbt vō dem den sie wolten erben. Das heyßt auch ein beut theylen vor dem sig. Ein schloß inn lufft bawen. Die haut verkauffen eh dann der Beer gstochen ist.