Auff hn. Christoff Vlrichs vnd fraw Elisabeth Wincklers hochzeit:
1.
Der ehstand ist der beste stand/
Und dessen band ein vestes band/
Damit man bindt auf erden/
Darumb auch in der gantzen welt/
Ein stand der Gotte mehr gefällt/
Nicht mag gefunden werden.
2.
Zwar auch der stand der geistlichkeit/
Der stand der lieben Obrigkeit
Sein billich hoch zuachten/
Weil jener vnser seelen nützt/
Vnd dieser vnser gut beschützt
Welchs billich zu betrachten.
[84] 3.
Doch/ weil der wehrstand nicht besteht/
Der lehrstand nicht von statten geht/
Wo nicht der neerstand mehret
Die (welch' in jhrer jungen zeit
Durch tugend werden vorbereitt)
Der lehr vnd wehrstandt ehret.
4.
Als wird ja billich dieser stand
Als eine quelle/ wie bekant/
Den andern vorgezogen/
Die jhr nu diesen stand veracht/
Vnd was ich sag' in grund veracht
Ey/ sprecht: es sey erlogen.
5.
Was deucht euch/ keuft wol gut vnd geld
Auch etwas in der gantzen welt/
Das dieser sey zu gleichen/
Die man mehr als sich selber liebt/
Die nur erfrewt/ vnd nicht betrübt/
Die nicht kan von vns weichen.
6.
Auf die man alle frewde bawt/
Der man seinn leib vnd gut vertrawt
Vnd der man kühnlich klaget
Was einem übels wiederfährt/
Was einem hie vnd da versehrt/
Was einn im hertzen naget.
7.
Sie tröstet uns/ sie steht vns bey/
Sie lässt vns nicht/ sie ist vns trew/
Es laufe/ wie es wolle.
Wenn vnser klagen niemand hört/
Wenn jeder uns den rücken keert/
Fragt sie doch/ was sie solle.
8.
Sie isst mit vns/ sie steht bey vns/
Sie drinckt mit vns/ sie geht mit vns/
Sie geht mit vns zu bette/
Man neyet sich/ man küsst/ man hertzt/
Man frewet sich/ man rüstt/ man schertzt
Man schläffet in die wette.
9.
Geht 's vns den wol/ sie frewet sich/
Gehts aber schlimm/ sie schewet sich/
Vnd weiss sich fein zu schicken/
Ist vns was lieb/ das läst sie nicht/
Ist vns was leid/ das thut sie nicht
Vnd hält vns offt den rücken.
10.
Herr bräutigam/ drümb preis' ich euch/
Vnd jhr fraw braut/ drumb weis' ich euch/
Daß jhr es wol getroffen/
In dem jhr beyde nun erlangt/
Wo nach euch bangend hat verlangt/
Ewr glücke steht euch offen.
11.
Vnd bringt jhr ewre jugend nu
Mit süsser frewd' vnd tugend zu/
So wartet Amors regens/
Erwartet/ als man euch erwartt/
(Dies ist der liebe wunsch vnd arth)
Erwartet Gottes segens.
12.
Den wünsch' ich euch zu dieser stund'/
In ewren stand' aus hertzen grund'
Er woll' euch benedeyen/
Daß jhr euch ewrer jugend-blum'/
Jhm nur zu lob/ vnd euch zu ruhm/
Im alter möget frewen.