Wann die Burger zu Radthauß gehn so geht der baur vor.
Der Römer Cornelius Tacitus schreibet / Wie die alten Teutschen zerstrewet gewohnet haben inn dörffern / vnnd haben wenig stätt gehabt / vnnd haben sich gesetzt / wo jnen ein wasser / ein wald vnd brunnen geliebt hat. Aber da die Römer Teutschland erobert / haben die Teutschen auch auff mauren vnnd Schlösser getrachtet. Es ist noch gewonheit im lande /daß wenn mann die Burger inn stätten zu Radthause berüfft / also sagt: Wer baur vnd burger ist / der mache sich herbei. Wer aber nit baur vnd burger ist /der mach sich davon. Ackerwerck vnd baurwerck ist der Teutschen narung gewesen.
[130] Da mann die wahl eins Königs vnd Römischen Keysers den Teutschen geben hat / seind in Teutschen landen die Stett vnd Flecken geteylt worden / also daß ja des baurn nie vergessen würde. Etlich fürsten heyssen Churfürsten. Der König zu Behem ist des Reichs Schenck / Die Pfaltz ist Truchseß / Sachsen ist Marschalck / Blandenburg ist Kamerdiener / Mentz ist Cantzler in Teutschen landen / Trier ist Cantzler in Gallien / Sabandien / vnd Franckreich / Cöllen ist Cantzler inn Lombardien vnd Italien. Vier sind Vicarien / Brabant / Sachsen / Westereich / vnd Schlesien.
Vier Kronen / Die kron zu Behem / zu Hungern /zu Dennmarck / zu Polen. Dann dise alle sind noch in dreihundert jarendes Reichs lehen gewesen. Es sind vier heuser / Das hauß zu Osterreich / zu Sachsen / zu Braunschweig / das hauß zu Beyern. Vier Seulen vnd stämme / Braunschweig / Beyern / Schwaben / vnd Lotringen. Vier Marggrafen / Mehrern / Brandenburg Meissen / Baden. Vier Landtgraffen / Döringen /Elsaß / Hessen / Leuchtenburg. Vier Burggraffen /Nürnberg / Magdeburg / Stramberg / Leißneck. Vier Grafen / Cleue / Sophoy / Schwartzburg / Zellt.
Vier Freiherrn / Limpurg / Westerburg / Thussis /Alwalden. Vier Ritter / Andelaw / Weissenbach / Frawenberg / Strundeck. Vier Stätt / Augspurg / Metz /Ach / Lübeck.
Vier Dörffer / Bamberg / Vlm / Hagenaw / Schletstat. Vier Bauren / Cöllen / Regenspurg / Costnitz /Saltzburg. Diß ist des Reichs ordnung / darein gehören bauren vnd burger / edel vnd vnedel.