Aller leut freund / iedermans geck.

Rechte freundtschafft ist wie ein Ehe mit wenigen vnd gůten / vnd ist nit müglich / daß der iedermans freund / iemãd zum freund habe / dann das gemeyn hebt / als vnreyn / niemand auff. Man findet leut / die so ein weite lange breyte liebe vnnd freundtschafft haben /daß sie sich zů iederman zůflicken / vnn wie kat /anns rad hencken / die laßt man auch wie kat / am rad hangen / vnd wirfft sie ein speych / als ein bürde vnn vnflat der andern dar / biß dz es das rad gar von sich wirfft / bald henckt sichs an ein ander rad. Also sind die gsellen mit jrer grossen freundtschafft / den geschicht wie denen so alles iederman glauben / die glauben vor zuuil glauben nicht / vnn der falsch freund / vor zuuil freunden lieht er niemand. Hund die iedermans gesell seind / hat man nit gern / sie bleiben nit / vnd der iedermans ist / ist niemands. Der hund der seinn herrn verlaßt / vnb vmb ein bißlin brot dir nachfolget / verlaßt auch dich so jhm ein anderer ein bißlin brots darwirfft / vnd gehorcht jm.