Bidermans Erb ligt in allen landen.

An allen orten ist gůt leben / wo das gemůt recht / vnd mit jm selbs eynig ist / Denn eines bidermans erb vnd sitze / das ist / ehr vnd tugent / ligt vnd gilt in allen landen.

Ein redlicher man ist seiner ehren halben an allen orten daheymen / vnd wo er zuuor gewesen ist / da mag er mit ehren wider hinkommen. Ein vnehrlicher man hat vor seinem gewissen nirgent růhe / darffe auch nit widerkommen / wo er zuuor gewesen / denn er hat nit gehandelt als ein biderman. Trewe handt geht durch alle land / vntrewe hand geht hin / aber nit herwider.