Daheym ist er ein man.
Extra periculum ferox.

Er nem ein ackerleng wegs für einn langen spieß / vnd wer wol so freudig als ein anderer. Er geb einn gůtē krieger hinder dem ofen. Weren brat würst hellenparten / so wer seins gleichen nit / er fiel in die feinde /wie ein saw über einen bettelsack. Ich meyn es sei ein freudiger krieger auff seinem mist.

Weit daruon ist gůt für dschüß / Hoch gnůg macht alt kriegsleut / ist sein reim. Zu teutsch / stuben krieger / bauren krieger / die all baurn wöllen fressen /vnd in ernst / jren feind / mit Demosthene / nicht gnůg dörffen sehen / Ein man auff seinem plan / Ein man hinder tisch. Ein Kauffman der verleurt / ist eben so wol ein kauffman / als der da gewint. Ein krieger so darnider ligt / ist eben so wol ein krieger / als der da sigt. Einer rhümbt sich eins mals seiner wunden / vnd masen seins zerhackten angesichts / wolt sich darbeifreudig vnd doppel solds werdt duncken. Der Herr sprach: Dise acht ich für freudiger / die dir diß gethon haben. Ein ander rhümbt sich gegē dem Haupt man gleicher masen vnd wunden / sagt / darbei sei abzunemen daß er nit geflohen sei. Der Hauptman sagt bald: Die seind auch nicht geflohen / die dirs gethon haben.