Schencken reicht nit.
Largitio non habet fundum.

Dleut nemen sich zutod. Aller welt geitz hat keinn boden / vnnd ist noch nie keinem gnůg geben / ja kein vatter der seinn kindern gnůg verlassen hab Es habē vil zuuil / spricht Seneca / niemand aber gnůg. Der bůler seckel ist mit Lawchblettern zůrnüpfft / das ist /er geht gern vff. Er hat vnmüssig gelt / Es schreiet jmmerzů: Laß auß. Sein gelt ist ein hůr es wil nur vnder frembden leuten sein. Es ist wie Zacheus auff allen kirchweihen. [317] Mann můß heut verthůn / daß man morgen auch hab. Es ist gůt alltag faßnacht haben /Drumb iß heut daß du morgen auch zuessen habest /vnd richte dein sach also / daß du morgen auch habest zuleben. Summa / halt faßnacht / daß du ein gůte Fasten vnd Ostern haben mögest. Mancher schlempt als habe ers im krieg geraubt. Er baußt als hab er sein gůt gefunden / Als hab ers an eim Heyden erfochten. Er stellt sich als ob mann jin gebotten hab in eil zuuerderben.