Ein handt juckt die ander.

Dienst wirt vmb dienst zuhauß geladen. Ein traub macht den andern zeitig. Ein grindiger laußt dem andern. Ein hund flohet dem andern. Korn vmb saltz. Gleichs für gleichs. Fünffzehen batzen für einn gulden geben. Wer dich kratzt / dem krawe. Ein eisen macht das ander scharpff. Eisen wetzt eisen. Gesatter übernzaun / gfatter wider herüber. Würst wider würst. Lon vmb lon. Wie du sehwest / so wirstu schneiden. Sehwet einer gůts / so schneidt er nichts böß / Es findt sich alles in der ernd / was vnd wie gesehwet.

Diogeni warff einer ob tisch die beyn dar / darumb daß er Cynicus / das ist / hündisch / hieß. Er stůnd auff vnd seycht an die gäst / darumb daß sie jn für einn hund hielten. Es gehört mehr zur reuterei oder regierung / dann zwey schenckel über ein pferdt schlagen. Es ist nicht gnůg daß man wol ansetzt / man můß auch mit ehren außfüren. Kanstus / so treibs / Vrbanus / so übs. Es ist nit gnůg / das gůt wissen / sonder auch das behalten / thůn / vnnd üben.