Mit halbem kosten halt man auch hauß.

Strick den sack halb zů. Socrates gieng ein mal übern marckt / vnd sahe souil vnnütz vnnötig ding / on welche die natur wol leben künne / einkauffen / sagt: O quàm multis carere possum. O wie kan ich so vil dings geradten. Man kannahend haußhalten / wann man wil. So vil vnnützen vnnd vnnötigen haußradt /gschirr / etc. findt man in reicher leut heuser / die mehr irren vnnd zumpracht dann zur not dienen. Der kan aber nicht oder wenig verlieren / der nicht oder wenig hat / vnnd dem geht wenig ab / der wenig begert / ja gar nicht. Der nicht mehr gert / der ist mitten in der armůt reich. Es gehn vil armer leut red in einn sack. Vor zeiten waren finster kirchen / aber liechte hertzen / Hültzin kelch / aber guldin pfaffen.

So bald der Römer reichthumb auffgienge / gieng jr glück vnd heyl ab ghen berg / biß sie gar zugrundt giengen Also mit Israel / also mit Babylon / Troia. Der arm / heyßt / das Gott erbarm.