Wie das maul / also die speiß.
Es schmeckt alles nach seinem vaß. Wie das vaß /also der wein / Wie der mund / also die speiß / Wie der baum also die frücht / Wie der meyster / also sein werck / Wie der bryl also das ding das mann dardurch sihet. Es kompt alles in sein art / vnd schmeckt nach seinem [239] vrsprung. Was zu erst in einn hafen kommet /darnach schmecket er weil sein ein scherb ist. Der reyn ist / des werck seind auch reyn / Prouer. xxj. Tit. ij. Alle speiß ist nach vnserm munde gerichtet /spricht Salomon. Ist der mund fieberig vnn vngeschmack / so ist jm wol das honig bitter / Gesundt schmeckt jm auch ein wassersup. Also wie wir seind /also vnsere werck. Es ist einem ieden ein ding wie er ist / Gelt / gůt / weib / kind / leiden / armůt / werck /wort / wein / leben / todt / etc. sind wie der ist der sie hat / nützt / braucht / oder mißbraucht / dem gůtē gůt / dem bösen böß. Merck / der mensch ist ein herr aller creatur vnnd eussern ding / so vnder jm / vnnd nit ob jm seind. Er ist jr herr vnd oberer / wie er ist / also ist jhm alle creatur / gůt oder böß / letz oder recht / als tag / kleyd / speiß / gelt / weib / kind / wort / werck /todt / leben / die all von des menschen wegen erschaffen / vnd er nit von jren wegen / daß sie jn herrschen /gůt oder böß machen solten / sonder er sie / sie sollen jm nachgehen vnnd dienen / das sie gern thůn / wo er sie recht braucht / vnnd in die händ nimpt. Greifft der herr letz darnach / vnd nimpt das messer bei der spitz / vnnd verschneidt sich / sei sein schuldt vnnd schad. Vergreifft er sich am wein / weib / gelt etc. das sei sein mißbrauch. Sie seind da jhm zudienen / brauchet ers wider sich selbs / vnnd gebeut der will / als der herr / den händen / so nemen sie das schwerdt / vnnd stechens jm inn leib. Gebeut der will dem mund / so nemen die gehorsamen händ das dienstlich gelt / oder den gehorsamen wein / vnd bieten dem mund / der schütt jn / ghorsam / ob jhm wol wee drob geschicht /inn leib / biß der man voll vnnd doll wirt / leib vnd seel kräncket. Der wein / gelt / speise / weib etc. sind gůte creaturn Gottes / zu dienst erschaffen / vnd geht nicht vnreyns inn mundt / vnnd ist nicht des weins schuldt / der zur frölicheyt erschaffen / den nechsten zu erlaben / sonder deines bösen affect vnd hertzens /so von innen herauß gehet / vnnd die gehorsam gůt creatur jhm zu dienst erschaffen / also mißbrauchet.