Wůchern ist mir verbotten / es fehlet mir an der hauptsumma.

Es ist in Teutschen landen breuchlich / daß man hundert gulden mit fünff gulden verzinset / vnnd der da hundert gulden außleihet / verdienet die fünff gulden mit seinem Interesse / daß er die weil mit hundert gulden souil oder mehr / als fünff gulden werdt sind /hette mögen erwerben. Nun mag sich ein fall begeben / daß einem gerathen würt mit hundert gulden / einem handtwercksmann oder händler / der gelt bedarff seinen glauben darmit zuerhalten / daß er sein lebenlang nutz daruon hat. Dann es richt sich offt mancher in einen handel / daß es jhn sein lebenlang hilfft / aber doch ists gemeyngklich wůcher / wo also schlecht mit gelt gehandelt wirt / daß der auß leihet kein fahr besteht / die er doch hett stehen müssen / so er bedacht were mit dem gelt zuwůchern: Vnnd die fahr ligt allein dem / der das gelihen gelt empfangen hat / auff dem halse / er genese oder verderbe / er gewinn oder verliere / so můß er dem den zinß geben / darmit auch vil Stätt inn Teutschen landen verdorben seind.

Einer leihet irgent einer Statt tausent gulden / die gantz Statt verschreibt sich zu solcher zinß / die verbrennet / die Burger ziehen hinweg / die Statt wirt wüst / noch stehet gleich wol diser zinß auff der statt /darüber sie auch verderben můß. Vnd eben hiedurch haben die reichen in den Stätten / vnd die geystlichen also vil zinß vnd erbgüter zusich gebracht / daß die summa offt zehen mal ist bezalet worden / vnd hat dannoch gleich wol den zins genommen / das ist als dann auch wůcher. Ehrlich vnnd göttlich wer es / daß man auff gůt gelt thette / souil als das gůt ertragen kündt / vnd wo es nicht geriethe / es wer an korn oder vihe / daß der leiher gleichen schaden tragen müste.

Also ist nun das war / wer wůchern wil / der můß etwas zuuor hinauß geben / das ist die hauptsumma. Vnd wo iemand seiner armůt vnnd vnuermögens selbs spottet / spricht er: Wůchern ist mir verbotten / es fehlet mir an der hauptsumma. Man mags auch reden von vilen also: Das seind keine wücherer / dann [123] es fehlet jn an der hauptsumma / dann sie seind arm.