Vil hund seind der Hasen todt.
Cedendum multitudini.

Dem pöfel weicht auch der teufel. Vil seck seind des Esels vndergang.

Wir sagen auch: Wann du überherret bist / so ist fliehen kein schand. Vollen bauren sol einfůder häw weichen. Ein man ist des andern werdt / zwen seind eins meyster / drei gar der todt. Vil gewinnen leicht eim ab.

Volle baurn sol mann zu dorff lassen. Behůt vns Gott vor gabelstichen / sie machen drei löcher. Wer nit förcht die Wolff vmb Liechtmeß / die baurn vmb Faßnacht / vnd die pfaffen in der Fastē / der ist ein verwegner kriegs man. Vil hend machen leichte bürd. Vil hend machen bald feirabendt. Zwen heben mehr dann einer. Vil hend im haar rauffen hart. Vil können vil. Mit vil weibern zeuget mann vil kinde. Vil können mehr dann einer. Vil erben machen schmale theyl.