Wer kan allzeit seiden spinnen.

Hiemit entschuldigt man die / so vnderweilen irren /oder mit worten vnd wercken also gebaren / daß es nit fast loblich ist. Wer kan es alle zeit so eben bedencken? Wer kan allzeit seiden spinnen? Seiden ist weych vnd zart / wer die spinnen soll / der můß hübschlich mit vmbgehn / daß ers nit verderbe / vnnd nichts vergesse. Also spinnet seiden / wer auff all sein red weißlich acht hat / bedenck / mit vernūfft / was er reden / thůn / vnd lassen soll. Herwiderumb / wer sich nit allweg fürsihet in reden vnn wircken / der spinnet nit seiden / sonder grob sackgarn. Man sagt: Es stehe einem weisen mann übel an / wann er spricht: Non putarā? Wann jm etwas widerfert / des er sich nicht versehen hette / Aber wo nemen? wo leben? Es fellt wol ein pferdt / hat vier fůß / ich geschweige ein mensch / das nur zwen hat.