Kleine häfen haben auch örhn.
Ein kleiner haf hat eben so wol zwey öhr oder ohrn /als ein grosser. Kleine leut haben auch hertz vnd verstand / es ligt nit allweg an der größ. Ein hund ist ein klein thier / aber er erlaufft ehe einn hasen / dann ein ochs oder beer. Kleine leut haben grosse hertzen /Mänlin haben mans hertz. Kleine glöcklin klingen auch / vnd etwan baß dann grosse. Ein byn vnd omeyß / sind so künstliche werckliche thierlin / daß jhn jhr ding kein löw oder beer nach mag thůn. Klein ding ist geschmeidig vnd zůthetig. Es ersticket kein mauß vnder einem håw hauffen. Es hat auch die omeyß jren zorn.
Mann tritt einen wurm so lang / biß er sich krümmet. Kleiner leuth halben ist nie kein schlacht verloren worden. Kleine leutlin / holder treutlin. Es ist kein nachtheyl on einn vortheyl / Gott hat mit einem sondern vortheyl der kleinen nachtheyl erstattet. Darumb sol keins das ander verachten / Ein iedes hat seine gabe / nutz vnd vortheyl / was an einem ort abgeht /geht am andern zů. Klein leut haben grosse hertzen /hoch vnnd künstlich sinn / daß etwan ein grosser man einn kleinen vmb hülff vnd rath můß anrůffen / so gar laßt die natur nicht dahinden. Kleine leut zürnen bald / zürnen doch nit lang.