1. General Tylli tractierete vmb Leipzigische Ergebung ins Todtengräbers Hause
Was kan man anders wol beym Todtengräber machen,
Als dingen vmb die Bahr' vnd andre Leichen-Sachen?
Drümb weil auch Tyllen ahnt', er würde müssen weichen,
Vnd nun zu Leipzig hier bestellen seine Leichen:
So ging' er selbst mit Fleiß, ohn alle Schew vnd Schämen
Ins Todtengräbers Haus, vnd ließ ein Maß ihm nehmen
Zum Sarg vnd zu der Gruft, besah auch selbst die Bahre,
Den Kirchhof vnd den Ort, der gegenüber ware.
Vnd zwar er solte fast gar wol gethan dran haben:
Denn ihn der Todten-Mann bald müssen mit begraben.
Ja wär er in der Flucht so feste nicht gewesen,
So wär er auch allhier, wie Schönberg, schon genesen.
Nun ist er itzt gleich fort, so muß er doch beklagen,
Daß er drey Schösse hab', vnd sey aufs Haupt geschlagen.