404. Vor dem jüngsten Gericht.

Ene dögetsame Fruwe, de by erem Wocken sat und gesponnen, heft my vertelt von enen Mann, genömet Kundt Alten, de er vermelt und gesegt, wat vor dem jüngsten Gericht noch scholde geschehen. Vererlei Geloven, also erstlik heidensche, de allrede gehat, tom andern papistische, darna das Evangelium up Latine gelesen wart, tom drüdden, so schall dat Evangelium up düdscher Sprake gelesen werden mank den Lüden, welkes man nömen wert de düdsche Misse, und tom veerden und letzten, wenn alle Avericheit hen und wedder mit enander werden anfangen mit Kriege und Upror, und de Eidum Karke to tween Malen is ostert von der See und Sande in gesettet worden, welkes unrede eenmael geschehen, so wart een seltsame und wunderlike Glove upkamen mank den Lüden, dat de ene Naber wart striden mit den andern um den Gloven, und de rechten Dener Godes und der Aposteln werden ut dem Lande wiken möten, und weh, weh denen, de disse Tyt werden beleven! Wente se werden ut ere egen Lande, von eren Oldern in fernen Landen reisen und nümmer wedder to den erigen kamen. Averst doch scholen dar etlike Bekannten een den andern bejegnen und seggen: »Wor kömpst du her?« edder: »Wor heff du dy so lange verborgen, dat du nich bist dod geschlagen edder gestorven?« und wenn solkes is geschehen, so is gewislik dat Ende und jüngste Gericht nicht wyt. Darumme alle Minschen olde und junge wol bidden mögen um een seliges Ende ut dissen Jammerdale.

Hans Kielholts Sylter Antiquitäten in Falcks Heimreich II, 346 aus dem 15. Jahrhundert??