Glaubensbekenntnis
(1530.)
1.
Wir glauben all an einen got,
schöpfer himels und der erden,
der sich zum vatter geben hot,
das wir seine kinder werden.
Er selb wil uns erneren,
leib und sel auch wol bewaren,
allem unfal wil er weren,
kein leit sol uns widerfaren;
er sorget für uns, hüt und wacht,
es stet alles in seiner macht.
2.
Wir glauben all an Jesum Crist,
seinen sun, an unsern heren,
Der ewig unser heilant ist,
durch den wir gezogen weren,
[64]Das wir zu dem vatter kumen
und im glauben und vertrauen,
kein werk mag uns darzu frumen,
allein muß er uns erbauen,
Cristus, gottes son, in seim nam
werd wir behalten allesam.
3.
Wir glauben all, das Jesus Crist,
uns vom heiling geist erkoren,
On menschlich werk entpfangen ist
und von Maria geboren,
Der iunkfrauen, alleine;
das unser entpfenknus auf erde
und unser geburt unreine
durch in gereinigt werde,
von der verdamnus werd gefreit
durch seine milte barmherzigkeit.
4.
Wir glauben all, das Jesus Crist
für uns sei am kreuz gestorben,
Unser versüner worden ist,
gnad unser sünt hat erworben,
Und ist worden auch begraben,
abgestigen zu den hellen,
derhalb wir kein feint mer haben,
der uns gewaltig künt quelen,
weil er uns bunden hat sünt, hell und tot,
bringen uns nit mer in ewig not.
5.
Wir glauben all, das Jesus Crist
am dritten tag auferstanden
Uns wider von den toten ist,
das wir von der sünden banden
Durch in werden auferwecket,
wandlen in eim neuen leben,
[65]von sünden werden abgeschrecket,
uns im genzlich ergeben,
und auf diser ert wandlen fort
allein nach seim heiligen wort.
6.
Wir glauben all, das Jesus Crist
sei gen himel aufgefaren,
Da er ewig beim vatter ist
und tut gnediklich bewaren
All sein glaubige christen
so sie herzlich zu im schreien
in not, vor irer feinde listen
wil er sie bschützen und freien,
er hat allen gwalt in seiner hent
in dem himlischen regiment.
7.
Wir glauben all, das Jesus Crist
widerum am jüngsten tage
Von dem himel zukünftig ist,
zu richten on all klage
Lebendig und auch die tote,
den teufel samt allen bösen
verdammen in helle note
und die glaubigen erlösen
von allem übel, angst und not,
zu leben ewiklich mit got.
8.
Wir glauben an den heiling geist,
der gotheit die dritt persone,
Der uns mit sein genaden speist
und zünt sein lieb in uns one;
Er tut uns auch sterke geben,
der sünt feint werden und meiden,
zu füren ein cristliches leben,
tröstet uns in allen leiden,
[66]hilft unser schwachheit, würkt in uns
den willn got vatters und des suns.
9.
Wir glaubn all, das der heilig geist
regiere die cristlich gmeine,
Die man die cristlich kirchen heist,
ist ein gespons Cristi reine,
Versamlet alhie auf erden
in glauben, tauf und einem sinne;
niemant mag selig werden,
wer nit beleibet darinne;
der ist verloren und kein glid
Cristi dort in ewigem frid.
10.
Wir glauben, durch den heiling geist
die sünt uns werden vergeben,
Wie uns denn Cristus selb verheist,
weil wir hie in diesem leben
Teglich in vil sünde fallen,
balt wir die herzlich bereuen,
so hilft er uns aus den allen,
tut den glauben verneuen;
der sünden bande er auflöst,
unser blödes gewissen tröst.
11.
Wir glauben, das der heilig geist
uns auch auferwecken werde
Am jüngsten tage allermeist
wie man uns grub in die erde,
In einem geistlichen leben
uns himlisch klarificiren
und die unsterbligkeit geben,
von leiblichen begiren
ledig und gar quit, nach dem ellent
in der letzten gmeinen urstent.
[67] 12.
Wir glaubn auch, das der heilig geist
allen cristen dort wert geben
Durch den vatter und sun gepreist
ein ewig seliges leben,
In den himelischen trönen,
bei der auserwelten schare,
das wir ewig gottes lob tönen.
das uns solches widerfare,
das helfe Cristus allen cristen.
wer das beger, sprech amen.