Die fünfundzwanzigste Fabel.
Vom Hirschen und Wolf.
Es het ein hirsch ein schaf verklagt,
Vor einem wolf heftig besagt,
Wie er dem schaf geliehen het
Ein scheffel korn auf seine bitt,
Den hab wol vor eim jar empfangen
Und könt von ime nicht erlangen,
Daß im sein korn wolt wider statten,
Und bat den wolf, daß er wolt raten,
Das schaf mit rechte dahin halten,
Daß es dem hirsch sein korn bezalte.
Der wolf fordert das schaf vor recht:
Da stund das einfeltig schaf so schlecht.
Wiewol es nicht wust umb die schuld,
So wolt es doch des wolfes huld
Verlieren nicht, und stund es zu
Und sprach: »Wil sehen, wie ich tu;
Gib mir noch frist: wo ich mag leben,
Wil dirs bezalen oder wider geben.«
Der wolf im ein termin bestimt:
Der hirsch die zeit in achtung nimt
Und fordert von dem schaf das korn.
Das schaf antwort: »Es ist verlorn.
Du bist ein bub von böser art,
Mein tag ich dir nichts schüldig ward.
[51]Daß ich aber bekant und zugestan,
Hab ich aus forcht des wolfs getan.
Zu dem gelöbd ist niemand verpflicht,
Das in der not aus zwang geschicht.«
Es ist der brauch in gmeinen rechten,
Gewalt mit gwalt zu widerfechten.
Die welt ist jetzt listig und klug:
Betrug bezalt sie mit betrug.
So wird entrichtet mancher strauß:
Ein nagel treibt den andern aus.